Zərdabda “8 Noyabr - Zəfər Günü”nə həsr olunmuş tədbirlər keçirilib

Zərdab rayonunda “8 Noyabr - Zəfər Günü”nə həsr edilmiş silsilə tədbirlər bu gün də davam etdirilir. 
Əvvəlcə rayon rəhbərliyi, şəhid ailələrinin üzvləri və Vətən müharibəsi iştirakçıları, millət vəkili Jalə Əliyeva, hüquq-mühafizə orqanlarının, idarə, müəssisə və təşkilatların rəhbərləri, ictimaiyyət nümayəndələri tərəfindən Zərdab şəhərindəki Şəhidlərin xatirə parkında tikilib istifadəyə verilmiş abidə ziyarət olunmuş, önünə gül-çiçək dəstələri qoyulmuşdur. Sonra abidə önündə “Zəfər günü” ilə bağlı tədbir keçirilmişdir. Tədbirdə çıxış edən Zərdab rayon icra hakimiyyətinin başçısı cənab Mərdan Camalzadə 44 günlük Vətən müharibəsi haqqında məlumat vermiş, Ali Baş Komandan cənab İlham Əliyevin rəhbərliyi ilə ordumuzun müharibədə möhtəşəm qələbə qazanaraq, dünya hərb tarixinə yeni şanlı səhifələr yazdığını diqqətə çatdırmışdır. Qeyd olunmuşdur ki, Vətən müharibəsində böyük, tarixi qələbənin qazanılmasına Zərdab rayonu da öz töhfəsini vermişdir. Azərbaycan Respublikasının Prezidenti cənab İlham Əliyevin 28 sentyabr 2020-ci il tarixdə Azərbaycan Respublikası ərazisində qismən səfərbərlik elan etməsi barədə sərəncamına uyğun olaraq rayonumuzun 452 nəfər sakini Səfərbərlik və Hərbi Xidmətə Çağırış üzrə Dövlət Xidmətinin Zərdab rayon bölməsində qeydiyyatdan keçərək Vətən müharibəsinə yola düşmüşlər. Bütün istiqamətlərdə gedən döyüşlərdə gənclərimiz böyük qəhrəmanlıq və şücaət nümayiş etdirmişlər. Bu müharibədə rayonumuz 8 şəhid vermiş, yüzlərlə yaralananlarımız olmuşdur. Respublika Prezidentinin sərəncamı ilə Vətən müharibəsində qəhrəmanlıq və şücaət göstərmiş yüzlərlə zərdablı Azərbaycan Respublikasının müxtəlif orden və medalları ilə təltif edilmişlər. Şəhidlərimizin adı əbədiləşdirilərək küçələrə adları verilmiş, xatirələrinə abidələr ucaldılmış, bulaqlar tikilmiş və bu istiqamətdə işlər bu gün də davam etdirilir. Gəlmə kəndində şəhidlərin dəfn olunduğu məzarlıq yenidən qurulmuş, Şəhidlərin xatirə parkı əsaslı təmir edilmiş, orada 125 şəhidimizin fotoşəkilləri həkk olunmuş xatirə abidəsi quraşdırılmışdır.
Tədbirdə millət vəkili Jalə Əliyeva da çıxış edərək Ali Baş Komandan cənab İlham Əliyevin rəhbərliyi altında qələbə ilə nəticələnən Vətən müharibəsində qanları ilə tarix yazan Azərbaycan əsgərinin şücaətindən danışaraq, bildirmişdir ki, qəhrəman gənclərimizin Vətən uğrunda göstərdiyi fədakarlıqlar dövlətimiz tərəfindən yüksək qiymətləndirilir. Onların hər biri orden və medallarla təltif olunmuş, ailələri dövlətin diqqət və qayğısı ilə əhatə olunmuşlar.
Tədbirdə şəhid ailələrinin üzvləri, müharibə iştirakçıları çıxış edərək şəhidlərin xatirəsinə göstərilən bu böyük diqqət və qayğıya görə cənab Prezident, Silahlı Qüvvələrin Ali Baş Komandanı cənab İlham Əliyevə və Birinci vitse-prezident Mehriban xanım Əliyevaya öz minnətdarlıqlarını bildirmişlər.
Tədbirin sonunda rayon mədəniyyət mərkəzinin əməkdaşlarının və məktəblilərin ifasında kompazisiya təqdim olunmuş və şəhid ailələrinin üzvləri, qazilər və müharibə iştirakçıları xatirə şəkili çəkilmişdir.
Sonra Gəlmə kənd qəbiristanlığında dəfn edilmiş şəhidlərin məzarları ziyarət olunmuşdur.
Rayon ərazisində şəhidlərin xatirəsinə ağacəkmə kampaniyası təşkil edilmiş, 400-dən çox müxtəlif növ ağaclar əkilmişdir.