ZƏRDABDA QANVERMƏ AKSİYASI KEÇİRİLİB
Dövlət Proqramına uyğun olaraq talassemiya xəstəliyindən əziyyət çəkən uşaqlara yardım məqsədilə 20 noyabr 2014-cü il tarixdə Zərdab rayonunda növbəti dəfə qanvermə aksiyası keçirilib. Humanitar tədbirin yüksək səviyyədə həyata keçirilməsi üçün rayon poliklinikasında hər cür şərait yaradılıb. Azərbaycan Respublikası Səhiyyə Nazirliyi B.Eyvazov adına Ematologiya Transfuziologiya İnstitutu nəzdində mərkəzi qan bankının 9 nəfərdən ibarət həkim briqadası rayona ezam olunub. Əvvəlcə donorların ümumi sağlıq durumu yoxlanılıb. Səhhəti imkan verən sakinlərdən qan nümunələri götürülüb. Humanitar aksiyada min nəfərə yaxın rayon sakini könüllü iştirak edib. Qanvermə aksiyasında təhsil, səhiyyə və mədəniyyət işçiləri, polis əməkdaşları, Suvarma Sistemləri İdarəsi və digər müəssisələrin kollektivləri daha fəal iştirak ediblər.
Qanvermə aksiyasında iştirak edən rayon sakinləri bu cür xeyirxah addımların əhəmiyyətini yüksək qiymətləndiriblər.
Qeyd edək ki, donorlardan alınan qan nümunələri qablaşdırılaraq mərkəzi qan bankına göndərilib.
