ZƏRDABDA XOCALI SOYQIRIMI YAD EDİLDİ
Xocalı soyqırımının 24-cü ildönümü ilə əlaqədar Zərdab rayonunda keçirilən silsilə tədbirlərin davamı olaraq 26 fevral 2016-cı il tarixdə rayon rəhbərliyi, əmək kollektivlərinin nümayəndələri, fəallar, veteranlar, ağsaqqal və ziyalılar, yuxarı sinif şagirdləri Şəhidlərin Xatirə parkını ziyarət etmişlər. Öncə Xocalı soyqırımına həsr olunmuş rəsmlərdən və divar qəzetlərindən ibarət sərgiyə baxış keçirilmişdir.
Xocalı faciəsinin 24-cü ildönümü ilə bağlı anım mərasiminin rəsmi hissəsində Rayon İcra Hakimiyyətinin başçısı cənab Lütvəli Babayev çıxış etmişdir. Bildirmişdir ki, Xocalıda baş verənlər Azərbaycan xalqının yaddaşından heç vaxt silinməyəcəkdir. Çünki həmin vaxt bütöv Azərbaycan xalqına qarşı soyqırımı aktı həyata keçirilmiş, bəşəriyyətin ən böyük faciələrindən biri törədilmişdir.
İcra başçısı qeyd etmişdir ki, Xocalı faciəsinin beynəlxalq aləmdə tanıdılması, erməni vəhşiliklərinin dünya ictimaiyyətinə çatdırılması istiqamətində Azərbaycanın birinci xanımı, Heydər Əliyev Fondunun prezidenti, millət vəkili, YUNESKO-nun və İSESKO-nun xoşməramlı səfiri Mehriban xanım Əliyevanın xidmətləri də danılmazdır. Heydər Əliyev Fondunun vitse-prezidenti Leyla xanım Əliyeva da “Xocalıya ədalət” beynəlxalq kampaniyası çərçivəsində bu qanlı faciə ilə bağlı geniş təbliğat və maarifləndirmə işi aparır və bu işlər bu gün də uğurla davam etdirilir. Ulu öndərimiz Heydər Əliyevin siyasi kursunu uğurla davam və inkişaf etdirən möhtərəm Prezidentimiz, Silahlı Qüvvələrimizin Ali Baş Komandanı cənab İlham Əliyev hazırda Ermənistan-Azərbaycan, Dağlıq Qarabağ münaqişəsinin beynəlxalq hüquq normalarına uyğun həlli, ölkəmizin ərazi bütövlüyünün bərpası, qaçqın və məcburi köçkünlərin doğma yurdlarına qaytarılması istiqamətində qətiyyətli fəaliyyət göstərir.
Sonra Xocalı faciəsinə həsr olunmuş ədəbi-bədii kompozisiya nümayiş olunmuşdur. Daha sonra rayonun əmək kollektivləri və ictimaiyyət nümayəndələri tərəfindən Azərbaycanlıların soyqırımı qurbanlarının xatirəsinə ucaldılmış abidə kompleksinin önünə gül-çiçək dəstələri qoyulmuşdur.
Rayonun məscidlərində Xocalı soyqırımı qurbanlarının xatirəsinə dini mərasimlər keçirilmiş, dualar oxunmuşdur.
