Zərdabda barama məhsulu tədarükünə başlanılıb
Bu il respublikamızda ilk dəfə Zərdab rayonunda 400 kiloqram barama “Şəki İpək” ASC-yə təhvil verilib. Kümçülərə yerindəcə hər kiloqram məhsula görə 8 manat ödənilib. Ümumiyyətlə, rayonda 7 tondan çox barama yetişdirilməsi gözlənilir.
Zərdab rayonunun Nəzəralılı,Şıxbağı və Bıçaqçı kəndlərində yaşayan fermerlər götürdükləri ipək qurdu toxumuna yüksək səviyyədə qulluq göstərərək keyfiyyətli barama yetişdirilməsinə nail olublar. Bu gün kümçülər respublikamızda ilk dəfə olaraq 400 kiloqram baramanı əvvəlcədən bağladıqları müqaviləyə əsasən “Şəki İpək”ASC-nin nümayəndəsinə təhvil veriblər. Fermerlərə hər kiloqram məhsula görə 8 manat ödənilib. Nəzəralılı kənd sakini Məmmədbağır Xəlilov 36 qram inkubasiya olunmuş ipək qurdu toxumu götürərək 101 kiloqram barama yetişdirib. Çəkdiyi əziyyət onun ailə büdcəsinə 808 manat gəlir gətirib. Digər kümdarlar Ülvü Həsənov və Timur Əhmədov də qazanclarından razıdırlar. “Şəki İpək” ASC-nin idarə heyəti sədrinin müşaviri Teymur Musayev məhsulun keyfiyyətini yüksək qiymətləndirərək fermerlərin bu sahəyə marağının artdığını vurğulayıb. Ümumiyyətlə, bu il zərdablı kümçülər rayon üzrə 20 qutu nəzərdə tutulduğu halda 150 qutu –yəni 2850 qram inkubasiya olunmuş ipək qurdu toxumu götürüblər. 75 kümdar “Şəki İpək”ASC ilə müqavilə bağlayıb. Bu sahədəki təcrübənin uzun illər unudulmasına baxmayaraq ipəkqurdunun bəslənilməsi normal şəraitdə aparılıb.7 tondan çox məhsulun təhvil verilməsi nəzərdə tutulur.
