Zərdab rayonunda 10 min hektar ərazinin suvarma təminatının yaxşılaşdırılması layihəsinin icrası başa çatmışıdr

2017-ci il yanvarın 30-da keçirilmiş “Azərbaycan Respublikası regionlarının 2014-2018-ci illərdə sosial-iqtisadi inkişafı Dövlət Proqramı”nın icrasının üçüncü ilinin yekunlarına həsr olunan konfransda Prezident İlham Əliyevin əkin sahələrinin suvarma suyu ilə təminatının yaxşılaşdırılması barədə tapşırıqlarına  əsasən, “Azərsu” ASC tərəfindən həyata keçirilən ilk layihənin icrası uğurla yekunlaşmışdır. Zərdab rayonunda 10 min hektar ərazinin suvarma təminatının yaxşılaşdırılmasını nəzərdə tutan layihə yeni torpaq sahələrinin əkin dövriyyəsinə cəlb edilməsinə imkan yaradacaq.
Yeni suvarma infrastrukturunun istismara verilməsi mərasimində Zərdab Rayon İcra Hakimiyyətinin başçısı Lütvəli Babayev ölkə rəhbərliyinin aqrar sektora böyük diqqət və qayğısından danışaraq bildirmişdir ki, bu layihə əkin sahələrinin dövriyyəyə cəlb edilməsi məqsədi ilə reallaşdırılan ilk suvarma layihəsidir. Yeni layihənin icrası nəticəsində minlərlə hektar torpaq sahəsində müxtəlif kənd təsərrüfatı məhsulları yetişdiriləcək.
Azərsu” ASC-nin sədr müavini Etibar Məmmədov “Azərbaycan Respublikası regionlarının 2014-2018-ci illərdə sosial-iqtisadi inkişafı Dövlət Proqramı”nın icrasının üçüncü ilinin yekunlarına həsr olunan konfransda Prezident İlham Əliyevin ərzaq təhlükəsizliyinin və ixrac potensialının artırılmasının təmin edilməsilə bağlı tapşırıqlar verdiyini diqqətə çatdırmışdır. Bu tapşırıqlardan irəli gələn vəzifələrin yerinə yetirilməsi məqsədilə fevral ayında Zərdab rayonunda ilk suvarma layihəsinin icrasına başlanmışdır: “Əkin sahələrinə suyun Kür çayından verilməsi layihələndirilmişdir. Bu məqsədlə çayın sahilində məhsuldarlığı saniyədə 3 kubmetr olansugötürücü qurğu, nasos stansiyası, diametri 1400 mm olan 15 km uzunluğunda kəmər inşa edilmişdir. Qurğuları elektrik enerjisi ilə təmin etmək üçün 4 mvt-luq  transformator və paylayıcı qurğu tikilmiş, Zərdab 35/10 kilovoltluq yarımstansiyasından 6 km elektrik xətti çəkilmiş, 81 ədəd dayaq quraşdırılmışdır. Layihənin qısa müddətdə yekunlaşdırılması məqsədilə tikinti-quraşdırma işləri bir neçə nöqtədə paralel aparılmış və iyun ayının əvvəlində yekunlaşmışdır”.
Tədbirdə çıxış edən rayon sakinləri və fermerlər torpaq sahələrinin suvarma təminatının yaxşılaşdırılması layihəsinin icrasına göstərilən diqqət və qayğıya  görə Prezident İlham Əliyevə minnətdarlıqlarını bildirmişlər.