95 saylı Zərdab-Kürdəmir-Ucar seçki dairəsinin deputatı Jalə Əliyeva Zərdab rayonunda növbəti dəfə seçiciləri ilə görüşüb
95 saylı Zərdab-Kürdəmir-Ucar seçki dairəsinin deputatı, Milli Məclisin Ailə, qadın, uşaq məsələləri komitəsinin sədr müavini Jalə Əliyeva Zərdab rayonunda növbəti dəfə seçiciləri ilə görüşüb. İlk öncə Ümummilli lider Heydər Əliyevin rayon mərkəzində ucaldılmış abidəsi ziyarət olunub, xatirəsi ehtiramla yad edilib. Daha sonra Heydər Əliyev Mərkəzində Milli Məclisin deputatı Jalə Əliyeva seçiciləri qəbul edərək ona ünvanlanan sualları cavablandırıb və seçiciləri narahat edən məsələləri dinləyib. Deputat müraciət olunan məsələlərlə bağlı müzakirələr aparıb, bir sıra məsələlər yerindəcə həll edilib, müvafiq dövlət qurumlarına təqdim edilmək üçün onlardan ərizələr qəbul edilib. Deputat Jalə Əliyeva eyni zamanda bir sıra məsələlərlə bağlı tövsiyələrini verib. Jalə Əliyeva seçicilərdən qəbul edilmiş ərizələrin hər zaman olduğu kimi, müvafiq dövlət qurumlarına göndəriləcəyini, qeyd edilən məsələlərə ən qısa müddətdə baxılmasına və onların müsbət həllinə çalışılacağını bildirib. Həmçinin görüşdə çıxış edən deputat Jalə Əliyeva seçicilərə cənab Prezident İlham Əliyevin yürütdüyü uğurlu daxili və xarici siyasət haqqında, ölkəmizdə həyata keçirilmiş islahatlar və hər bir Azərbaycan vətandaşının, xüsusilə də şəhid ailələri, qazilər və müharibə iştirakçılarının sosial təminatının yaxşılaşdırılması sahəsində ölkə başçısının imzaladığı fərman və sərəncamlar barədə geniş məlumat verib. Qəbul iştirakçıları deputat Jalə Əliyevaya onları diqqətlə dinlədiyinə, yaratdığı səmimi ortama və problemlərinin həllinə yaxından kömək etdiyinə görə minnətdarlıqlarını bildiriblər. Ölkədə, eyni zamanda Zərdab rayonunda həyata keçirilən quruculuq işlərinə görə cənab Prezident İlham Əliyevə təşəkkürlərini çatdırmağını xahiş ediblər, hər zaman dövlət başçısı İlham Əliyevin apardığı daxili və xarici siyasəti dəstəklədiklərini ifadə ediblər. Qəbulda Zərdab Rayon İcra Hakimiyyətinin İctimai-siyasi və humanitar məsələlər şöbəsinin müdir müavini-dini qurumlarla işin təşkilatçısı Murad Həsənov, Vətən müharibəsi iştirakçıları və şəhid ailələri ilə işin təşkili şöbəsinin böyük məsləhətçisi Famil Abbasov iştirak ediblər.
