Azərbaycan Ağsaqqallar Şurasının Zərdab rayon təşkilatında hesabat konfransı keçirilib
10 iyun 2024 | 15:40
Şəhər və rayon Ağsaqqallar Şuralarında təşkilatların son dövrdəki fəaliyyətləri ilə bağlı növbəti hesabat konfransı Zərdab rayonunda təşkil olunub.
Konfransda Azərbaycan Ağsaqqallar Şurasının sədr müavini, professor Vahid Novruzov, Zərdab Rayon İcra Hakimiyyəti başçısının birinci müavini Ramo Hacıyev, Azərbaycan Ağsaqqallar Şurasının Aparat rəhbəri Ramin Həsənli və təşkilatın məsul işçisi Elşad Quliyev, habelə rayon ağsaqqalları, ziyalılar, şəhid ailələrinin üzvləri, ictimaiyyət nümayəndələri iştirak ediblər.
Tədbir iştirakçıları əvvəlcə Ulu Öndər Heydər Əliyevin abidəsi önünə gül dəstələri düzərək, xatirəsini ehtiramla anıblar.
Konfransda topaqlarımızın işğaldan azad olunması uğrunda şəhid olan qəhrəman əsgər və zabitlərimizin, həmçinin hesabat dövründə vəfat etmiş ağsaqqalların xatirəsi bir dəqiqəlik sükutla yad olunub.
Azərbaycan Ağsaqqallar Şurasının sədr müavini, professor Vahid Novruzovu və tədbir iştirakçılarını salamlayan Rayon İcra Hakimiyyəti başçısının birinci müavini Ramo Hacıyev Ümummilli Liderimiz Heydər Əliyevin ağsaqqallara göstərdiyi yüksək qayğıdan, onları “milli-mənəvi dəyərlərimizin qızıl fondu” adlandırmasından söz açıb. Bildirib ki, hazırda bu diqqət və qayğı Azərbaycan Respublikasının Prezidenti cənab İlham Əliyev və Birinci vitse-prezident Mehriban xanım Əliyeva tərəfindən yüksək səviyyədə davam etdirilir. Ağsaqqalların Zərdab rayonundakı xidmətlərindən ətraflı bəhs edən natiq vurğulayıb ki, ağsaqqal məsləhətinə, ağsaqqal sözünə, öyüd-nəsihətinə hər birimizin, xüsusilə də gənclərimizin böyük ehtiyacı vardır. R.Hacıyev ağsaqqalların bundan sonra da ölkəmizin ictimai-siyasi və mədəni həyatında yaxından iştirak edəcəklərinə əmin olduğunu bildirərək, konfransın işinə uğurlar arzulayıb.
Sonra Zərdab Rayon Ağsaqqallar Şurasının sədri Rasim Hüseynov görülən işlərlə bağlı hesabat məruzəsi ilə çıxış edərək, yerli təşkilatın fəaliyyəti barədə ətraflı məlumat verib. Vurğulayıb ki, cəmiyyətimiz və dövlətimiz tərəfindən hər zaman yüksək dəyərləndirilən ağsaqqallarımız hesabat dövrü ərzində aktual mövzularda keçirilmiş bir çox tədbirlərdə iştirak və çıxışlar ediblər, şəhid ailələrinin üzvləri və qazilərlə görüşlər keçiriblər, onlara mənəvi dəstək olublar, gənclərimizlə maarifləndirici söhbətlər aparıblar. Həmçinin Ağsaqqallar Şurasının üzvləri “Heydər Əliyev İli” çərçivəsində rayonda keçirilən bütün tədbirlərdə yaxından iştirak edərək, Ümummilli Liderimizin zəngin irsinin təbliğ edilməsini davam etdiriblər. Fəaliyyətləri boyunca xalqımızın milli-mənəvi dəyərlərinin qorunmasına, əxlaqi normaların və sağlam həyat tərzinin təbliğinə öz töhfələrini verən ağsaqqallar cari ilin fevral ayında keçirilən növbədənkənar prezident seçkilərində də fəallıq nümayiş etdirərək cənab İlham Əliyevi hərtərəfli dəstəkləyiblər. Qeyd olunub ki, rayonun ağsaqqalları bundan sonra öz fəaliyyətlərini aktiv şəkildə davam etdirəcəklər.
Azərbaycan Ağsaqqallar Şurasının sədr müavini, professor Vahid Novruzov çıxış edərək Şuranın sədri, millət vəkili, professor Eldar Quliyevin və İdarə Heyətinin üzvlərinin salamlarını konfrans iştirakçılarına çatdırıb və hər bir kəsi qarşıdan gələn Qurban bayramı və Milli Qurtuluş Günü münasibətilə ürəkdən təbrik edib. Xalqımızın Ümummilli Lideri Heydər Əliyevin Azərbaycanın hərtərəfli inkişafında, müstəqil ölkəmizin dünya birliyində layiqli yerini tutmasında misilsiz xidmətlərindən bəhs edən natiq hazırda bu tərəqqi strategiyasının möhtərəm Prezidentimiz cənab İlham Əliyev tərəfindən uğurla davam etdirilməsindən, onu rəhbərliyi ilə qazandığımız yüksək nailiyyətlərdən söz açıb. Vurğulayıb ki, 30 ilə yaxın erməni işğalı altında olan tarixi torpaqlarımız Müzəffər Ali Baş Komandanımız cənab İlham Əliyevin rəhbərliyi ilə rəşadətli Ordumuzın, qəhrəman övladlarımızın sayəsində azad edildi. Bu gün həmin ərazilərimizdə böyük inkişaf prosesi, genişmiqyaslı quruculuq, məskunlaşma, “Böyük Qayıdış” həyata keçirilir, Qarabağımız canlanır.
Sonra Vahid Novruzov 2020-ci ildə millət vəkil, professor Eldar Quliyev Azərbaycan Ağsaqqallar Şurasının sədri seçildikdən sonra təşkilatın illik İş planları əsasında bir çox sahələrdə gördüyü əhəmiyyətli işlər barədə ətraflı məlumat verib və Şuranın son üçillik fəaliyyətinin əks olunduğu kitabı təqdim edib. Xüsusi olaraq vurğulayıb ki, ölkəmizin ictimai-siyasi həyatında hər zaman yaxından iştirak edən ağsaqqallarımız cari ilin fevral ayında keçirilən növbədənkənar prezident seçkilərində də üzərilərinə düşən vəzifələri yüksək səviyyədə yerinə yetiriblər. Azərbaycan Ağsaqqallar Şurasının onminlərlə üzvü təbliğat-təşviqat kampaniyasında və səsvermə prosesində fəal iştirak edərək xalqımızın mütləq əksəriyyəti kimi cənab İlham Əliyevə olan yüksək etimadlarını nümayiş etdiriblər. Sonda Vahid Novruzov rayon təşkilatının hesabatını qənaətbəxş hesab edərək, ağsaqqalların hər birinə möhkəm cansağlığı və gələcək fəaliyyətlərində uğurlar arzulayıb.
Konfransda çıxış edən digər natiqlər də rayon ağsaqqallarının fəaliyyətindən danışıblar. Bildiriblər ki, ölkəmizin hər yerində olduğu kimi Zərdab rayonunda da Azərbaycanın inkişafı naminə həyata keçirilən bütün işlərdə və tədbirlərdə ağsaqqallar yaxından iştirak edir, sakinlərin, xüsusilə də gənc nəslin maarifləndirilməsinə böyük əhəmiyyət verirlər. Əmin olduqlarını bildiriblər ki, ağsaqqallar bundan sonra da rayonun ictimai-mədəni həyatında fəallıq nümayiş etdirəcəklər.
Keçidlər
