Azərbaycanlıların Soyqırımı gününün 107-ci ildönümü ilə əlaqədar tədbir keçirilib

Anım mərasimində Zərdab Rayon İcra Hakimiyyəti başçısının birinci müavini Ramo Hacıyev, YAP Zərdab rayon təşkilatının sədr müavini, rayonun hüquq-mühafizə orqanlarının rəhbərləri, idarə, müəssisə və təşkilatların rəhbərləri, əmək kollektivlərinin üzvləri, ictimaiyyət nümayəndələri iştirak ediblər. Tədbir soyqırım qurbanlarının və ölkəmizin müstəqilliyi uğrunda şəhid olmuş vətən övladlarının ruhuna dualar verilməsi ilə başlanılıb. Şəhidlərin Xatirə parkında soyqırımı qurbanlarının şərəfinə ucaldılan abidə kompleksi ziyarət olunub, önünə gül dəstələri qoyularaq şəhidlərimizin xatirəsi ehtiramla yad edilib. Rayon İcra Hakimiyyəti başçısının birinci müavini Ramo Hacıyev çıxış edərək 1918-ci ilin mart-aprel aylarında on minlərlə dinc sakinimizin etnik və dini mənsubiyyətinə görə qətlə yetirildiyini, insanların işgəncələrə məruz qaldığını, onlara qəsdən fiziki qüsurlar yetirildiyini qeyd edib, erməni vəhşiliyinin dünya ictimayyətinə çatdırılmasında dövlətimizin gördüyü işlərdən danışıb. Vətən müharibəsində və 2023-cü ilin sentyabrında keçirilmiş lokal xarakterli antiterror əməliyyatlarında Müzəffər Ali Baş Komandanın rəhbərliyi ilə misilsiz igidlik nümunələri göstərən qəhrəman ordumuzun soyqırım qurbanlarının da qisasını aldığını, şəhidlərimizin qanının yerdə qalmadığını diqqətə çatdırıb.