Kənd təsərrüfatı işçiləri günü qeyd olunub
Zərdabda 01 noyabr - Kənd təsərrüfatı işçiləri günü qeyd olunub. Tədbirdə Zərdab Rayon İcra Hakimiyyəti başçısının birinci müavini Ramo Hacıyev, kənd təsərrüfatı təmayüllü idarə və müəssisələrin əmək kollektivlərinin üzvləri iştirak ediblər. Tədbir iştirakçıları əvvəlcə Heydər Əliyev parkında Ümummilli liderin abisədini ziyarət edib, önünə gül dəstələri düzüblər. Tədbir Zərdab Dövlət Aqrar İnkişaf Mərkəzinin binasında davam edib. İcra başçısının birinci müavini Ramo Hacıyev çıxış edərək tədbir iştirakçılarını və aqrar sahədə çalışan bütün əməkdaşları peşə bayramları münasibətilə təbrik edib, onlara gələcək işlərində uğurlar arzulayıb. Tədbirdə çıxış edənlər aqrar sahədə Ulu Öndər Heydər Əliyevin başladığı islahatların uğurla həyata keçirilməsindən, cənab Prezident İlham Əliyevin kənd təsərrüfatı məhsulları istehsalçılarına qayğısından, bu sahənin inkişafından və qarşıda duran vəzifələrdən danışıblar.
