Millət vəkili Jalə Əliyeva Çallı kəndində ötən il baş verən dəhşətli yanğından zərər çəkən Əhmədovlar ailəsini ziyarət edib
12 fevral 2023 | 10:57
Paylaşımda deyilir:
"Bu gün Zərdab rayonunun Çallı kəndində ötən il baş verən dəhşətli yanğından zərər çəkən Əhmədovlar ailəsini - Əliağa və Gülayə Əhmədovaları ziyarət etdik.
Məlumat üçün bildirim ki, həmin hadisə nəticəsində ailənin iki üzvü (ana və azyaşlı qız uşağı) vəfat etmiş, bir üzvü-8 yaşlı Gülməmməd ağır yanıq xəsarətləri alaraq, tanınmaz vəziyyətə düşmüş, ev isə tamamilə yanmışdı. Böyük faciəylə qarşılaşan ailəni tək buraxmayan rayon və kənd camaatı, yardımsevərlər, rayon rəhbərliyi ailənin evinin qısa zamanda bərpa edilməsi üçün köməyini əsirgəmədi və qısa müddətdə ev tikilib hazır edildi. Təmir-tikinti ustaları da təmənnasız işlədilər.
Ailə bu ötən bir il ərzində daim diqqətimizdə olub. Özüm və köməkçim Firdovsi Eyvazov vasitəsilə davamlı olaraq onların problemləri və mümkün həlli yollarıyla maraqlanmış, xüsusilə ağır yanıq xəsarətləri alan Gülməmmədin sağalması üçün yardımlarımızı əsirgəməmiş, mütəmadi olaraq Gülnəmmədin atası Pərvinlə əlaqə saxlamış, dövlət qurumlarına müraciət etmişəm.
İki gün öncə isə balaca Gülməmməd Bakıda əməliyyat olundu. Gülməmmədə əməliyyat öncəsi xəstəxanada baş çəkdim, həkimləriylə görüşdüm, əməliyyatın gedişatı və mümkün nəticələrini müzakirə etdik.
Bunu da qeyd edim ki, yardımsevər, mərhəmətli insanlarımız Gülməmmədin əməliyyatı üçün ehtiyacları olan vəsaitin də toplanmasında ailəyə yaxından dəstək olaraq, bu məqsədlə kampaniya keçirdilər. Dostlarımız Nicat İntiqam, Coşqun Abdullayev, Vüqar Rəhimov, Şirvani Hümmətoğlu bu sırada ilk yerlərdə gəlirdilər. Hər birinə, bütün yardım edənlərə, bir gecədə anasını, bacısını, evini və sağlamlığını itirən Gülməmmədə dəstək olan hər kəs Var olsun!
Bir uşaq gülərsə, bütün dünya gülər! Tanrım bütün uşaqların daim üzünü güldürsün!"
Keçidlər
