"Qubadlıda Susan ürək" adlı kitabın təqdimatı keçirilib

18 oktyabr 2024-cü il tarixdə Heydər Əliyev Mərkəzində rayonun Gəlmə  kəndindən olan Vətən müharibəsi şəhidi, mayor Rəhim Hüseynovun  xatirəsinə həsr olunmuş "Qubadlıda Susan ürək" adlı kitabın təqdimatı keçirilmişdir. Tədbirdə rayon icra hakimiyyəti başçısının birinci müavini  Ramo Hacıyev,  kitabın müəllifi Sevinc Rza, Rəhim Hüseynovun  və digər zərdablı  Vətən müharibəsi şəhidlərinin ailə üzvləri, şəhidin döyüş yoldaşları, eləcə də rayon ictimaiyyətinin nümayəndələri, məktəblilər iştirak etmişlər. Vətən uğrunda canlarından keçən şəhidlərimizin əziz xatirəsi bir dəqiqəlik sükutla yad edildikdən sonra Azərbaycanın Dövlət himni səsləndirilmişdir. Sonra Azərbaycan Silahlı Qüvvələrinin mayoru, 44 günlük Vətən müharibəsində Qubadlı  rayonunun azad edilməsi uğrunda qəhrəmancasına şəhidlik zirvəsinə ucalmış Rəhim Hüseynovun  keçdiyi mənalı ömür və şərəfli döyüş yolundan söhbət açılmışdır. Çıxış edənlər cənab Prezident, Müzəffər Ali Baş Komandan İlham Əliyevin rəhbərliyi ilə şanlı ordumuzun Vətən müharibəsində əldə etdiyi tarixi qələbədən, ölkəmizdə şəhid ailələrinə, qazilərə, müharibə iştirakçılarına göstərilən yüksək dövlət qayğısından danışmışlar. Məktəblilərin ifasında kompozisiya nümayiş edilmişdir. Sonda iştirakçılara "Qubadlıda Susan ürək" kitabı hədiyyə edilmişdir.