Zərdabda 8 Mart - Beynəlxalq Qadınlar Günü münasibətilə tədbir keçirilib

7 mart 2023-cü il tarixdə Yeni Azərbaycan Partiyası Zərdab rayon təşkilatının inzibati binasında Rayon İcra Hakimiyyətinin başçısı Mərdan Camalzadənin, Yeni Azərbaycan Partiyasının rayon təşkilatı sədrinin, Azərbaycan Dövlət İdarələri və İctimai Xidmət İşçiləri Həmkarlar İttifaqı Zərdab rayon komitəsinin sədrinin, şəhid analarının, rayonun ictimai həyatında fəal iştirak edən və səmərəli əmək fəaliyətinə görə fərqlənən qadınların iştirakı ilə tədbir keçirilib.

Tədbir Ümummilli liderimiz Heydər Əliyevin və torpaqlarımızın ərazi bütövlüyü uğrunda şəhid olan qəhrəmanlarımızın əziz xatirəsinin bir dəqiqəlik sükütla yad edilməsindən sonra açıq elan edilib. Giriş nitqi ilə çıxış edən Rayon İcra Hakimiyyətinin başçısı Mərdan Camalzadə Azərbaycan qadınının milli və mənəvi dəyərlərin təminatçısı kimi çıxış  etdiyini, qadınların çalışdıqları hər sahədə uğur qazanmaları, şəxsi həyatla ictimai fəaliyyətlərini tam uyğunlaşdırmaları üçün ölkəmizdə hər bir şəraitin yaradıldığını, dövlətimiz tərəfindən qadınlara xüsusi diqqət və qayğı göstərildiyini, onların əməyinin mütəmadi olaraq yüksək qiymətləndirildiyini diqqətə çatdırıb.

Tədbirdə çıxış edən YAP rayon təşkilatının sədri İlkin Əliyev  müstəqil Azərbaycanın qazandığı bütün uğurlarında qadınların xidmətlərinin əvəzsiz olduğunu, həmçinin 8 martın qadınların iqtisadi, siyasi və ictimai hüquq bərabərliyi uğrunda mübarizədə beynəlxalq həmrəyliyi günü kimi qeyd olunduğunu da vurğulayıb.

Sonda görüşdə iştirak edən qadınlara hədiyyələr təqdim edilib və xatirə şəkli çəkilib.